പരിക്കേറ്റ തെരുവ് നായയെ മൃഗാശുപത്രിയിലെത്തിച്ച്, അതിന് ചികിത്സ ലഭിക്കുന്നതുവരെ കൂടെത്തന്നെ നിന്ന് പരിചരിച്ച വയോധികന്റെ വീഡിയോയാണ് സമൂഹ മാധ്യമങ്ങളിൽ ശ്രദ്ധേയമാകുന്നത്.
യാതൊരു സ്വാർഥതാൽത്പ്പര്യവുമില്ലാതെ സഹജീവികളോട് കാണിക്കുന്ന ഈ വലിയ കരുണയെ പ്രശംസിക്കുകയാണ് നെറ്റിസൺസ്.
വിദിത് ശർമ്മ എന്ന വ്യക്തി എക്സിൽ പങ്കുവെച്ച ദൃശ്യങ്ങളാണ് ജനശ്രദ്ധ നേടിയത്. അപകടത്തിൽപ്പെട്ട ഒരു തെരുവ് നായയെ കണ്ട് വയോധികൻ സ്വയം മുൻകൈയെടുത്ത് ആശുപത്രിയിൽ എത്തിക്കുകയായിരുന്നു. പരിശോധനാ മേശയിൽ കിടത്തിയിരിക്കുന്ന നായയുടെ തൊട്ടടുത്ത്, അത് ഒറ്റപ്പെടാതിരിക്കാൻ ശാന്തനായി അദ്ദേഹം കൂട്ടിരിക്കുന്നത് വീഡിയോയിൽ കാണാം.
ഏതാനും ദിവസങ്ങൾക്ക് മുൻപ് വളർത്തുമൃഗത്തിന്റെ ചികിത്സയ്ക്കായി ആശുപത്രിയിലെത്തിയ സംഗീത എന്ന സ്ത്രീയാണ് ഈ കാഴ്ച പകർത്തിയതെന്നും, മനുഷ്യത്വം ഇന്നും ജീവനോടെയുണ്ടെന്ന് തെളിയിക്കുന്നതാണ് ഈ സംഭവമെന്നും കുറിച്ചുകൊണ്ടാണ് വീഡിയോ പങ്കുവെച്ചിരിക്കുന്നത്. പണത്തെക്കാളും സാമൂഹിക പദവിയെക്കാളും വലുതാണ് സഹജീവികളോടുള്ള സ്നേഹമെന്ന് ഈ സംഭവം ഓർമ്മിപ്പിക്കുന്നുവെന്ന് സോഷ്യൽ മീഡിയ ഉപയോക്താക്കൾ അഭിപ്രായപ്പെട്ടു.
